Haideblitz ond Sonneschai

Liebe Vädder ond Müadr,

was isch Ihr Hauptuffgab als Vadder ond Muadr?
Kenne mr ons druff einige,
dees isch d´Erziehung Ihrer Kender, odder?
No gugge mr moal, was des hoist.
Hot Ihr Kend em Kenderzemmer a Glodze,
womeglich au no en Rekorder schdande?
Wie alt isch Ihr Kend?
Wieviel Schdonde hoggt Ihr Kend vor dere Glodze?
Wie, des wisset Se net?

Ach, i han dengt, Se erziehet Ihre Kender?!

So gans näbebei, Se wisset scho,
dass Fernsehglodze im Kenderalter bleed macht
ond älles bloos net lernfördernd isch?
Wann henn Se  s´ledschde Moal die DVD ond Videosammlung
Ihrer Kender durchforschded ond guggd,
ob älles Kender ond Jugendfrei isch? Wie? Noch nie?

Ach, i han dengt, Se erziehet Ihre Kender?!

Welche Computerspiele spielet Ihre Noachkömmling?
Des wisset Se net? Warum net?
Isch Ihr Internetzugang dahoim für Sex-
und Gewaltverherrlichende Seiten g´sperrt?
Welche Internetseite hot Ihr Kend in de letzte 7 Dag oaguggt?
Wie, des henn Se no nie kontrolliert?
Isch Ihne d´Erziehung Ihrer Kender egal?
Wieso laufet in ons´m Land bewaffnete Kender
in´d Schul ond bedrohet Ihre Mitschüler ond Lehrer?
Wieso saufet ond rauchet so viele Kender?
Wieso longret so viele Kender Ohbends uff de Stroass rom?

Ach, Se saget , des liegt an d´Erziehung?

Na, dann, liebe Vädder ond Müadr, seiet mutig.
Fanget o, Eure Kender zu erziehen.
Ihr müsset Eure Noachkömmling zeige, wie se durchs Läbe kommet,
Ihr müsset Vorbilder sei, Ihr müsset de Kender Halt gäbbe ond uffzeige,
welche Meglichkeiten, im Gute wie im Schlechte,
d´Mensch in seim Läbe hot ond welche Richtung er eischlage ko.
Heret uff, älles uff d`Gsellschafd zoam schiebe.
D´Gsellschafd isch emmer s`Spiegelbild därer, die dren läbed!

Lasst Sonne in Euer Herz

Euer Michel FreiMönch